Што значыць Дзень абаронцаў Айчыны для прадстаўніц прыгожай паловы Жабінкаўшчыны?

Сёння віншаванні будуць прымаць прадстаўнікі моцнай паловы чалавецтва, якія заўжды гатовы абараніць сваю краіну, сям’ю, малую радзіму. А што значыць Дзень абаронцаў Айчыны для прадстаўніц прыгожай паловы Жабінкаўшчыны?

Вікторыя МАЙСЕЕВІЧ, медыцынская сястра санаторыя “Надзея” УП “Брэстаблгаз”:

– Дзень абаронцаў Айчыны – важнае свята, якое мае векавую гісторыю, і дарагое для кожнага з нас. У гэты дзень мы ўшаноўваем абаронцаў нашай Радзімы, а таксама віншуем маладое пакаленне: хлопчыкаў і юнакоў, якія ў будучым папоўняць шэрагі Узброеных Сіл нашай краіны. Але ў першую чаргу віншаванняў заслугоўваюць тыя, хто ў розны час абараняў нашу краіну, і тыя, хто зараз аберагае спакойны сон беларусаў, тыя, хто на працягу многіх гадоў адданы Айчыне, верны абавязку і прысязе.

Таццяна МАРХЕЛЬ, старшая медыцынская сястра стацыянарнага аддзялення паліятыўнай медыцынскай дапамогі Брэсцкай гарадской бальніцы паліятыўнай дапамогі «Хоспіс»:

– У нашай краіне цяжка знайсці сям’ю, дзе б не пакінула свой водгалас Вялікая Айчынная вайна. У кожным доме, у кожнай сям’і ёсць свае героі, і памяць аб іх мы беражліва захоўваем і перадаем з пакалення ў пакаленне. У далёкія агнявыя саракавыя гады абаронцы нашай Айчыны ахвяравалі жыццямі дзеля мірнага неба і спакойнай будучыні сваіх дзяцей. Яны вызвалілі Беларусь ад фашысцкай навалы, зрабілі нашу краіну свабоднай і незалежнай. Дзень абаронцаў Айчыны – гэта дзень, калі мы ўспамінаем тых, хто абараняў нашу Радзіму, віншуем кожнага, хто робіць гэта сёння. Для мяне гэта вельмі значны дзень, у які мы аддаём даніну павагі ўсім, хто стаіць на абароне не толькі межаў нашай дзяржавы, але і нашай будучыні, мірнага неба, дзіцячага смеху. У Беларусі моцная армія. Служачы ў войску, нашы хлопцы атрымліваюць загартоўку, сілу волі, урокі патрыятызму і павагі да герояў. 23 лютага – гэта свята сапраўдных мужчын.

Алена ЯКІМЧУК, выконваючая абавязкі старшыні Хмелеўскага сельвыканкама:

– 23 лютага – дзень памяці, мужнасці і гераізму, свята ўсіх пакаленняў абаронцаў, якія адстаялі незалежнасць нашай дзяржавы. Лічу, што ў першую чаргу гэта свята ваенных, на якіх і ў мірны час ускладзена важная і адказная задача – абараняць Радзіму. Усе мужчыны ў маёй сям’і служылі ў войску: і тата, і брат, і дзядзька, і муж. А дзядуля па матулінай лініі Васілій Трафімавіч Шаталаў ваяваў на франтах Вялікай Айчыннай вайны, годна выканаў свой абавязак перад Бацькаўшчынай. Яго мы часцей успамінаем у Дзень Перамогі, якую ён здабываў разам з іншымі нашымі землякамі.

Ірына ГУРСКАЯ, дырэктар Ленінскай сярэдняй школы:

– Для мяне Дзень абаронцаў Айчыны – гэта магчымасць выказаць словы ўдзячнасці і прызнанасці моцнай палове чалавецтва, мужчынам, якія ў выпадку неабходнасці стануць на абарону нашай Радзімы, тым, якія служаць ва Узброеных Сілах нашай краіны, каб мы мелі магчымасць жыць пад мірным небам і працаваць на карысць дзяржавы.

Хочацца пажадаць мужчынам Жабінкаўшчыны быць надзейнай падтрымкай родным і блізкім, не баяцца цяжкасцей, захоўваць спакой і ўпэўненасць у любой жыццёвай сітуацыі, здзяйсняць прыгожыя высакародныя ўчынкі!

Таццяна ЯРАШУК, начальнік эканамічнага сектара УП “Жабінкаўская ПМК-10”:

– 23 лютага – гэта вялікае значнае свята. З аднаго боку, яно звязана з абаронай краіны. А краіна – гэта не толькі дзяржава, але і сям’я, родныя людзі, якіх трэба аберагаць. З другога боку, гэты дзень нагадвае пра наша слаўнае гістарычнае мінулае, пра якое трэба расказваць маладому пакаленню. Асабіста я з вялікай цеплынёй і хваляваннем адношуся да Дня абаронцаў Айчыны. Усіх мужчын віншую з гэтым святам і жадаю, каб у нас не зводзіліся сапраўдныя абаронцы.

Наталля КАВЯРГОВІЧ
Фота аўтара і з архіваў удзельніц апытання

Больше новостей о своем районе и городе Жабинка можно найти в нашем Телеграм-канале по ссылке https://t.me/selsk_prav

Поделиться ссылкой:

Popularity: 1%

Сельская праўда

Добавить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.