Алена Каралевіч з Жабінкі памнажае славу працоўнай дынастыі

Аператар працэсу перапрацоўкі зерня Алена Каралевіч ужо шмат гадоў аддана рупіцца на Жабінкаўскім камбікормавым заводзе. За працяглы час Алена Фёдараўна, ствараючы ўласную працоўную біяграфію, заслужыла павагу ў людзей і не аднойчы мела ўзнагароды на раённым ды абласным узроўнях.

Алена Каралевіч не першая ў родзе, для каго, як у песні, “праспяваў гудок заводскі”. На прадпрыемстве з часам склалася сапраўдная працоўная дынастыя.

Пачынальнікам яе стала маці – Вера Кабась. Яна 28 гадоў адпрацавала апаратчыкам камбікормавай вытворчасці, які цяпер завецца аператарам працэсу перапрацоўкі зерня. Пэўны час на камбікормавым заводзе шчыраваў слесарам сын Веры Сямёнаўны Георгій, а зараз сапраўднай прадаўжальніцай працоўнай дынастыі стала дачка Алена, якая літаральна заняла матуліна месца, калі тая пайшла на заслужаны адпачынак. Дарэчы, ёсць ужо і трэцяе пакаленне дынастыі камбікормаўцаў Кабасеў – Каралевічаў, паколькі і Аленіна дачка Аня таксама звязала лёс з заводам. Аднак сёння яна крыху адышла ад працоўных спраў, але тое сталася па вельмі ўважлівай прычыне. Зараз Ганна Васільеўна выконвае надзвычай адказную і прыемную місію: гадуе двух цудоўных сыночкаў-пагодкаў Платона ды Назарку. Калі хлопчыкі крыху падрастуць, прадстаўніца “камбікормавай” дынастыі спадзяецца зноў вярнуцца на роднае прадпрыемства, дзе яе паважаюць, памятаюць і чакаюць.

А цяпер зноў вернемся да той, каго Ганна ўзнагародзіла высокім званнем “двойчы бабуля”.

Разам з Аленай Каралевіч трохі адматаем стужку часу назад, каб патрапіць у апошні сакавіцкі дзень 2000 года, калі Алена Фёдараўна ўлілася ў вялікі калектыў Жабінкаўскага камбікормавага завода, што нездарма завецца флагманам нашай індустрыі.

У той памятны веснавы дзень наша гераіня прыйшла на працу ў камбікормавы цэх. Ён нездарма ўтрымлівае назву, аднолькавую з усім прадпрыемствам: камбікормавы – цэх асаблівы, аснова ўсёй вытворчасці, таму і шчыруюць у ім людзі надзвычай умелыя пад кіраўніцтвам Ірыны Мацукі. А ўвогуле, зазначым, працэс стварэння усёй прадукцыі, якой славіцца завод-флагман у Жабінцы і далёка за яе межамі, ажыццяўляецца пад кіраўніцтвам начальніка вытворчасці Аксаны Яхалкоўскай.

– Нават не заўважыла, як час прабег, і вось ужо дваццаць тры гады – а гэта, паверце, вельмі нямала! – працую на заводзе, што стаў родным, – дзеліцца Алена Каралевіч. – Люблю сваю справу і людзей, якія працуюць побач. Ужо больш за пятнаццаць гадоў даводзіцца шчыраваць са зменай майстра Мікалая Юхімука. У маіх непасрэдных абавязках – кантроль работы абсталявання на лініі гранулявання, а таксама неабходна пастаянна сачыць за якасцю выпускаемай прадукцыі. Стараюся ўсё рабіць з адказнасцю, разумеючы, наколькі важнай агульнай справай заняты камбікормаўцы.

Усё ж нездарма кажуць: па працы і пашана. Алена Фёдараўна даўно на добрым рахунку ў кіраўніцтва прадпрыемства. Зусім невыдкова двойчы імя Алены Каралевіч упрыгожвала Дошку гонару Жабінкаўскага камбікормавага завода. А ўжо пералічыць заахвочванні, якія мела наша гераіня за амаль чвэрць веку сумленнай працы, нават не бяромся. Назавем толькі апошнюю па часе ўзнагароду, атрыманую на ўрачыстасці, прысвечанай Дню работнікаў сельскай гаспадаркі і перапрацоўчай прамысловасці аграпрамысловага комплексу. З пэўным хваляваннем у ліку лепшых Алена Фёдараўна ўзнімалася, каб атрымаць з рук намесніка генеральнага дырэктара кіруючай кампаніі холдынгу “Канцэрн Брэстмясамалпрам” Уладзіміра Мількевіча Ліст падзякі Брэсцкага абласнога выканаўчага камітэта. А зала ў тое імгненне з задавальннем апладзіравала годнай прадаўжальніцы працоўнай дынастыі.

Анатоль БЕНЗЯРУК
Фота Кацярыны ЯКУБЁНАК

Больше новостей о своем районе и городе Жабинка можно найти в нашем Телеграм-канале по ссылке https://t.me/selsk_prav

Поделиться ссылкой:

Popularity: 1%

Сельская праўда

Добавить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.