“СМІ павінны заставацца на вастрыі жыцця”

“СМІ павінны заставацца на вастрыі жыцця”

Анатоль БЕНЗЯРУК. Фота аўтара.

Такую думку выказаў галоўны рэдактар газеты “Заря”, старшыня абласной арганізацыі Беларускага саюза журналістаў Аляксандр Лагвіновіч, задаючы тон пленарнаму пасяджэнню семінара-практыкума “Работа са зваротамі грамадзян у сродках масавай інфармацыі”, што ладзіўся 5 кастрычніка ў Івацэвічах.

Шчырай размове папярэднічалі сустрэчы ў Івацэвіцкай ЖКГ і мясцовым тэрытарыяльным цэнтры сацыяльнага абслугоўвання насельніцтва. Намеснік дырэктара жыллёва-камунальнай гаспадаркі Уладзімір Бурдзь пазнаёміў удзельнікаў семінара з тым, як на ягоным прадпрыемстве пастаўлена работа са зваротамі грамадзян, якое ўзаемадзеянне маюць службы ЖКГ не толькі са службамі МНС, праваахоўнымі органамі, але і з раённай газетай “Івацэвіцкі веснік”. Прынамсі, за дзевяць месяцаў у раёнцы было змешчана 20 публікацый (у асноўным, аб’яў і тлумачэнняў), што дазваляе аператыўна даносіць да жыхароў горада і раёна звесткі пра змены ў аплаце камунальных паслуг, тарыфы ЖКГ, мажлівасці камунальнікаў у вырашэнні праблем і пытанняў, што хвалююць грамадзян.
Незабыўны след у памяці гасцей пакінула, бясспрэчна, наведванне Івацэвіцкага тэрытарыяльнага цэнтра сацыяльнага абслугоўвання насельніцтва. Удзельнікі семінара ўвачавідкі маглі пабачыць, як маладыя інваліды з дапамогай супрацоўнікаў установы прылучаюцца да сённяшняга няпростага жыцця, у якім бывае складана нават тым, хто фізічна здаровы і актыўны. Існуе, між іншым, сацыяльны магазін, праз які інваліды, надзеленыя талентамі, рэалізуюць цудоўныя рэчы, зробленыя ўласнымі рукамі. Прадстаўнікі СМІ пазнаёміліся з асаблівасцямі працы са зваротамі грамадзян у тэрытарыяльным цэнтры.
А далей усіх чакала прыемная неспадзяваная сустрэча, не прапісаная асобным радком у праграме мерапрыемства. У прасторнай зале тэрытарыяльнага цэнтра адбылося ўганараванне літаратурнай прэміяй імя Уладзіміра Калесніка Анатоля Галушкі. Гэты таленавіты, мужны і сарамлівы чалавек – прыклад для многіх, хто “мае дзве рукі, але апускае іх”. Анатоль Мікалаевіч з 16 гадоў прыкаваны да інваліднага крэсла. Таму 26 верасня, калі ў Брэсцкім дзяржаўным універсітэце імя А.С. Пушкіна адбывалася афіцыйнае ўручэнне Калеснікавай прэміі, неаднойчы выказваліся шкадаванні, што “аўтара выдатнай кнігі “Яблычны Спас” няма сярод нас”. І вось спрыяльная нагода – у рамках семінара-практыкума сабраліся прадстаўнікі пішучай браціі, сябры лаўрэата, каб у цёплай, амаль сямейнай абстаноўцы ўручыць “узнагароду, што знайшла свайго героя”. Адзін з тых, хто паспрыяў выхаду ў свет кнігі, – адказны сакратар газеты “Івацэвіцкі веснік” Валерый Гапееў, – прыгадаў, як няпроста ішлі творы аўтара да чытача. Анатоль Галушка не толькі паэт і празаік, ён яшчэ і цудоўны мастак, чые палотны можна пабачыць не толькі ў Беларусі (прынамсі, у Парламенце краіны, у зборах Прэзідэнта Аляксандра Лукашэнкі), але і ў блізкім ды дальнім замежжы. Пры гэтым Анатоль Мікалаевіч піша свае карціны, трымаючы пэндзлік у зубах…
Дыплом лаўрэата прэміі імя У.А. Калесніка таленавіты нараджэнец івацэвіцкай зямлі атрымаў з рук першага намесніка начальніка галоўнага ўпраўлення ідэалагічнай работы, культуры і спраў моладзі Вадзіма Ляўковіча. У сваім віншавальным слове Вадзім Мікалаевіч падзякаваў таленавітаму аўтару і ягоным сябрам за цудоўны падарунак – кнігу, у якой гучаць матывы надзеі, аптымізму і глыбокай любові да роднага краю.
Са свайго боку, мне ў якасці члена Савета абласнога аддзялення СПБ пашчасціла павіншаваць аднаго з найбольш самабытных сяброў берасцейскай літаратурнай суполкі з прызнаннем ягоных заслуг у прыгожым пісьменстве.
Пад уражаннем гэтай сустрэчы ўдзельнікі семінара сабраліся ў будынку Івацэвіцкага раённага выканаўчага камітэта, каб прадоўжыць працу ў фармаце дыялогу. Папярэдне праслухалі намесніка старшыні райвыканкама Аляксандра Вялікасельца. Аляксандр Фёдаравіч на цудоўнай беларускай мове распавёў пра свой раён, яго гістарычны лёс і сучаснае сацыяльна-эканамічнае развіццё.
Удзельнікаў семінара, бясспрэчна, цікавіла тое новае, што з’яўляецца ў заканадаўстве і тычыцца работы журналістаў са зваротамі грамадзян. Пра гэта падрабязна распавяла начальнік аддзела па рабоце са зваротамі грамадзян і юрыдычных асоб Брэсцкага гарвыканкама Ірына Мокат. Ірына Уладзіміраўна адказала на праблемныя пытанні, што хвалявалі прадстаўнікоў сродкаў масавай інфармацыі, прывяла прыклады, якія адбываліся на практыцы ў такой няпростай сферы, як скаргі, пажаданні, крытычныя заўвагі з боку людзей.
Акрамя таго, намеснік начальніка аддзела ідэалагічнай работы галоўнага ўпраўлення ідэалагічнай работы, культуры і спраў моладзі Галіна Мазіна, абапіраючыся на публікацыі ў раённых газетах, прааналізавала работу журналістаў Брэстчыны ў згаданым накірунку.

Popularity: 1%

Оставить комментарий

Ваш электронный адрес не будет опубликован.


*