Пасля двухмесячнага перапынку перад жабінкаўцамі зноў расчынілі свае дзверы гарадскія лазні. У гэтым бясспрэчная заслуга нашых камунальнікаў.
— Лазні вельмі запатрабаваныя жыхарамі Жабінкі, асабліва тымі, хто ведае толк ад парылкі і атрымлівае ад гэтага сапраўднае задавальненне, якое і блізка не здольна прынесці хатняя ванна, — адзначае начальнік участка “Кацельная гаспадарка” Мікалай Бажкоў.
Пры гэтым падчас распаўсюдж-вання каранавіруснай інфекцыі неабходна прытрымлівацца рэкамендацый, прапанаваных раённым цэнтрам гігіены і эпідэміялогіі. Найперш, не дапускаць у лазні работнікаў і наведвальнікаў з прыкметамі рэспіраторных інфекцый; берагчы здароўе працаўнікоў, непасрэдна занятых абслугоўваннем насельніцтва; кожную змену праводзіць уборку з выкарыстаннем сродкаў дэзынфекцыі; тое ж рабіць пасля кожнай групы наведвальнікаў; а ў месцах агульнага карыстання (фае, холах) забяспечваць наяўнасць дазатараў для апрацоўкі рук. Увогуле, у лазнях трэба мець дастаковы запас мыючых, дэзынфікуючых, антысептычных сродкаў ды сродкаў індывідуальнай аховы органаў дыхання.
Ёсць рэкамендацыі і да аматараў лёгкай пары. Перш-наперш, разам у памяшканні павінна знаходзіцца не больш за пяць чалавек. Пры гэтым нельга забывацца пра сацыяльнае дыстанцыраванне, якое складае не менш за паўтара метра.
А зараз прыводзім графік работы гарадскіх лазняў. Першую, што працуе ў самым цэнтры Жабінкі на вуліцы Кірава, можна наведваць з 10.00 да 22.00: жаночы дзень — пятніца, мужчынскі — субота.
Лазня на вуліцы Цітова, што ў мікрараёне цукровага завода, адчынена для аматараў лёгкай пары тры дні на тыдзень: па пятніцах з 12.00 да 22.00 — для жанчын, а для моцнай паловы — у суботу (паміж 12.00 і 22.00) ды ў нядзельны дзень з 9 гадзін ранку да поўдня.
Антон БЕРАСТОК
Главные новости