Наступная пяцігодка павінна стаць пяцігоддзем маладой Беларусі. Аб гэтым заявіў кіраўнік дзяржавы Аляксандр Лукашэнка, звяртаючыся з Пасланнем да беларускага народа і Нацыянальнага сходу.
Прэзідэнт адзначыў, што заўсёды з вялікай цікавасцю ставіцца да думак і ідэй, якія выказваюць прадстаўнікі маладога пакалення. «Галоўнае, каб яны рухалі нашу краіну наперад, — падкрэсліў ён. — Лічу, што будучая пяцігодка павінна стаць пяцігоддзем маладой Беларусі. Равеснікі незалежнасці, тыя, каму сёння 25-30 гадоў, — самае актыўнае і перспектыўнае пакаленне, здольнае надаць магутны імпульс развіццю краіны, зрабіць яе канкурэнтаздольнай і паспяховай у самых розных сферах. Сфарміраваць аблічча новай Беларусі, накіраванай у будучыню».
Аляксандр Лукашэнка адзначыў адкрытасць сучаснага свету, дзе актыўна перамяшчаецца ўсё: тавары, грошы, людзі — пераважна моладзь, як самая актыўная і рухомая частка любога грамадства. «Пры гэтым кожная дзяржава хоча ўтрымаць самых таленавітых у сябе. Мы не выключэнне. Беларуская дзяржава заўсёды падтрымлівала і будзе падтрымліваць моладзь», — запэўніў Прэзідэнт.
У Беларусі ёсць магчымасць атрымаць не толькі бясплатную сярэднюю і вышэйшую адукацыю, але і гарантаванае першае працоўнае месца. «А ў сучасным свеце гэта дарагога каштуе. А колькі яшчэ будзе каштаваць…» — заўважыў беларускі лідар. Ён нагадаў пра сітуацыю, у якой апынуліся некалькі тысяч студэнтаў, якія вучыліся ў Польшчы. З-за пандэміі каранавіруса іх вымусілі пакінуць гэту краіну. «І яны папрасіліся назад, у «несвабодную» краіну, да «дыктатара». «Дыктатар» іх прыняў і за гэта атрымаў — яны ўсе посцяцца і хайпуюць. Але нічога — я перажыву. Галоўнае, каб мы з вамі гэта перажылі», — адзначыў Аляксандр Лукашэнка.
«Вядома, вельмі важна стварыць умовы для запатрабаванасці моладзі тут, у Беларусі, і мы гэта робім», — прадоўжыў ён. У якасці прыкладу Прэзідэнт прывёў стварэнне шырокіх магчымасцей для навучання па розных спецыяльнасцях у такіх сучасных галінах, як ІТ-тэхналогіі, атамная энергетыка, асваенне космасу. «Работы шмат у сябе дома. Але калі ты ўбачыў доўгі рубель за межамі краіны, мы цябе прывязваць не будзем. Але павінен заўсёды помніць: ты сюды абавязкова вернешся, рана ці позна, — сказаў кіраўнік дзяржавы. — Таму што тут твае карані. Таму, бываючы там, за межамі нашых граніц, нашай светлай Беларусі, ніколі не паказвай пальцам у яе бок. Яна цябе вырасціла, узгадавала і дала адукацыю, таму ты такі круты за межамі гэтай краіны».
Па матэрыялах БелТА