“Бяспека — у кожны дом!”
Асноўнымі прычынамі ўзнікнення надзвычайных сітуацый у жылым сектары па-ранейшаму застаюцца неасцярожнае абыходжанне з агнём, парушэнне правілаў эксплуатацыі пячнога ацяплення і электраабсталявання, дзіцячае свавольства з агнём. З мэтай папярэджання пажараў і гібелі людзей ад іх з 24 студзеня па 11 лютага на Жабінкаўшчыне праходзіць рэспубліканская акцыя “Бяспека — у кожны дом!”. Выратавальнікі сустракаюцца з працоўнымі калектывамі, наведваюць пажылых і адзінокіх людзей, ладзяць гутаркі з моладдзю.
З мэтай папярэджання пажараў у жыллі супрацоўнікі РАНС нагадваюць, што не варта перагружаць электрычную сетку, карыстацца самаробнымі электрапрыборамі, а таксама пакідаць без нагляду электранагравальныя прыборы. Не паліце ў пасцелі самі і не дазваляйце рабіць гэта сваім родным. Бацькі, сачыце за тым, чым займаецца ваша дзіця, спыняйце свавольства з агнём. Памятайце, што ваша бяспека ў вашых руках!
Якая кніга стала хітом?
У бібліятэках раёна завяршыліся бібліявыбары “Кнігахіт-2021”. Па выніках галасавання чытачоў быў складзены топ-10 найлепшых кніг 2021 года. Адкрывае дзясятку кніга Бэна Элтана “Два браты”. Радком ніжэй размясціўся раман-прытча Юліі Вазнясенскай “Мае пасмяротныя прыгоды”, следам ідзе дэтэктыўны раман швейцарскага пісьменніка Жоэля Дзікера “Праўда пра справу Гары Квеберта”, а пад шчаслівай лічбай сем апынуўся раман “Географ глобус прапіў”, аўтар якога Аляксей Іваноў. На шостае месца жабінкаўцы паставілі пісьменніка са шматгалосага Стамбула Эльчына Сафарлі з яго “Домам, у якім гарыць святло”. На юбілейным пятым радку — “Сардэчная атрута” Уладзіміра Колычава, а на чацвёртым — раман аўстралійскага пісьменніка Грэгары Дэвіда Робертса “Шантарам”. Барабанны дроб, бо раскрываем назвы кніг, якія сталі лідарамі галасавання. “Бронзу” жабінкаўцы аддалі кнізе “Лёс непрынятым пройдзе” (аўтар Таццяна Алюшына). Зусім крыху не хапіла Вячаславу Праху — “Словы, якія нам не казалі бацькі” размясціліся на другім месцы. Урэшце пераможцай стала кніга Васіля Сарычава “У пошуках страчанага часу”. Сярод жабінкаўскіх чытачоў яна аб’яўлена хітом 2021 года!
Падарылі казку
Хлопчыкі і дзяўчынкі з валанцёрскага атрада “Дабрадзеячы” Маціевіцкай базавай школы прынялі ўдзел у традыцыйнай дабрачыннай акцыі падчас зімовых святаў. Яны падарылі калядную казку выхаванцам цэнтра карэкцыйна-развіццёвага навучання і рэабілітацыі Жабінкаўскага раёна. Валанцёры разам з дзеткамі збіралі пазлы, гулялі ў цудоўныя снежкі, выраблялі сімвал года — тыграня-гарэзу, а яшчэ спявалі песенькі. Усе ўдзельнікі мерапрыемства атрымалі зарад станоўчых эмоцый!
У музеі новая выстава
Жабінкаўскі раённы гісторыка-краязнаўчы музей запрашае наведаць новую экспазіцыю, прысвечаную Дню народнага адзінства. На выставе прадстаўлены плакаты і газеты, якія адлюстроўваюць развіццё Беларусі як суверэннай дзяржавы. Даведацца пра ўсе падрабязнасці можна пры наведванні музея, экскурсавод адкажа на пытанні, якія ўзніклі.
Пераможца — Брэстчына
У Мінску адбыўся другі этап юнацкай лігі бокса Рэспублікі Беларусь сярод юнакоў 2008-2009 гадоў нараджэння. Зборная каманда Брэсцкай вобласці выйграла ў Магілёўскай з лікам 8:7. У яе складзе баксіравалі і жабінкаўскія спартсмены. У сваіх вагавых катэгорыях перамаглі Ілля Мацвяюк і Аляксандр Кавалеўскі. Яўгену Андрасюку крыху не пашанцавала на гэты раз, але ўсё абавязкова атрымаецца ў наступны!
Падборку падрыхтавала Дар’я НІКАНЧУК
Поделиться ссылкой:
Popularity: 1%
