Шматгранная дзейнасць пракуратуры, шырокі спектр яе паўнамоцтваў забяспечваюць рэальную абарону правоў асобы, грамадства і дзяржавы. Гэта цудоўна ўсведамляе намеснік пракурора Алена Сідарук, для якой гэты год звязаны з дзвюма юбілейнымі датамі: Алена Міхайлаўна ўжо адсвяткавала свае 50 гадоў з дня нараджэння, з іх роўна палова прысвечаны працы ў пракуратуры.
Намеснік пракурора – дзяржаўны служачы, які валодае няўхільным аўтарытэтам у сістэме дзяржаўных органаў. Гэта і пасада, і прафесія, і, без сумневу, прызванне. Не кожны юрыст можа займаць гэтую пасаду, бо праца патрабуе высокай прафесійнай падрыхтоўкі і бездакорных маральных якасцяў. Важна ні ў якім разе не паддацца эмоцыям і дзейнічаць у межах заканадаўства. Усё гэта ў поўнай меры ўласціва Алене Сідарук. Да слова, у верасні 2023 года Алена Міхайлаўна першай на Жабінкаўшчыне сярод жанчын атрымала званне саветніка юстыцыі, што суадносіцца са званнем падпалкоўніка міліцыі.
Кожны чалавек праходзіць сваю жыццёвую дарогу, на якой надзвычай важна не памыліцца ў прафесіі. Шлях Алены Міхайлаўны літаральна з першага імгнення звязаны з Жабінкай. Тут, у будучым горадзе-спадарожніку, у маі 1974 года яна прыйшла на свет. Любоў да роднага горада спадарожнічае з ёю і праз дзесяцігоддзі.
А ў думках наша суразмоўніца міжволі пераносіцца ў школьныя часы, калі выспеў інтарэс да юрыспрудэнцыі і ўзнікла мара стаць юрыстам. Гэта прафесія была вельмі прэстыжнай, таму і конкурсы на юрыдычныя спецыяльнасці былі надзвычай высокія. Нягледзячы на гэта, пасля школы Алена паступіла ў Гарадоцкі сельскагаспадарчы тэхнікум, дзе вучылася па спецыяльнасці “Правазнаўства”. Дзяўчына атрымала дыплом з адзнакай і вярнулася на малую радзіму ў любімы з маленства горад, дзе жылі яе бацькі. Тут Алена Міхайлаўна, як прыйшоў час, знайшла сваё жаночае шчасце і выйшла замуж.
Працоўную дзейнасць пачала ў жабінкаўскай падатковай інспекцыі, аднак не пакідала даўняй мары аб юрыспрудэнцыі, таму паступіла завочна ў Гродзенскі дзяржаўны ўніверсітэт імя Янкі Купалы на юрыдычны факультэт.
Калі сумленна, першапачаткова Алена Сідарук не мела на мэце працаваць менавіта ў пракуратуры, але з часам зразумела, што гэта тое месца, дзе можа паўнавартасна прымяніць атрыманыя веды і аказаць рэальную дапамогу грамадству.
Амаль чвэрць стагоддзя таму, з восені 1999 года, Алена Міхайлаўна прысвяціла жыццё абароне законнасці і справядлівасці, пры гэтым прайшла наступныя прыступкі кар’ернай лесвіцы: памочнік пракурора Жабінкаўскага раёна, пракурор аддзела па наглядзе за адпаведнасцю закону судовых рашэнняў па грамадзянскіх справах пракуратуры Брэсцкай вобласці і, нарэшце, з 2008 года – намеснік пракурора нашага раёна.
У яе шырокія паўнамоцтвы. Намеснік пракурора ажыццяўляе нагляд за дакладным і аднастайным выкананнем разнастайных нарматыўных прававых актаў, законаў пры вядзенні адміністрацыйнага працэсу. Як спатрэбіцца, апратэстоўвае незаконныя рашэнні, падтрымлівае дзяржаўнае абвінавачанне. Разам з тым, роля дзяржаўнага абвінаваўцы – не адзіная функцыя ў крымінальным працэсе. Выступаючы ад імя дзяржавы, Алена Сідарук прымае меры да ўстаранення парушэнняў закону, незалежна ад таго, кім яны дапушчаны.
Аднак, нягледзячы на ўсю складанасць, прызнаецца Алена Міхайлаўна, гэтая праца ёй падабаецца. Асаблівае пачуццё задавальнення адчуваецца тады, калі ўдаецца вырашыць праблемы людзей, задаволіць інтарэсы абодвух бакоў. Чалавек адказны, пісьменны, які валодае высокім інтэлектам і аналітычным мысленнем, намеснік пракурора неаднаразова заахвочвалася кіраўніцтвам абласной пракуратуры, а ў ліпені 2014 года Указам Прэзідэнта краіны была ўзнагароджана медалём “За бездакорную службу ІІІ ступені”.
Алена Сідарук ужо не ўяўляе сябе ў іншай прафесіі, за гэты час упэўнілася, што некалі зрабіла правільны жыццёвы выбар. І няхай яе праца складаная, але цікавая і патрэбная. Да таго ж прафесія патрабуе пастаяннага самаўдасканалення, бо неабходна сачыць за ўсімі зменамі заканадаўства, каб ведаць і прымяняць законы для абароны інтарэсаў грамадзян і дзяржавы.
На думку калег, Алена Міхайлаўна разумная, пяшчотная і аддана кахаючая сваіх блізкіх. Яна адбылася ў прафесіі, каханні і мацярынстве.
У Дзень работнікаў пракуратуры наша гераіня шчыра жадае ўсім, хто звязаў лёс з гэтай важнай і адказнай прафесіяй, росту па службе, моцнага здароўя і сямейнага шчасця.
Анатоль БЕНЗЯРУК
Фота аўтара
Popularity: 1%