Запасы кармоў папоўніць кукуруза

Запасы кармоў папоўніць кукуруза

Набірае абароты “зялёнае жніво”. На Жабінкаўшчыне, як паказвае першы тыдзень уборачнай кампаніі, найбольш урадлівыя для кукурузы ракітніцкія палі. Сёння на іх самая высокая ўраджайнасць — гаспадары збіраюць кукурузнай масы па 392 цэнтнеры з гектара.
— Дзякуючы таму, што цёплае, сонечнае надвор’е спалучалася з частымі дажджамі, кукуруза на палетках “вымахала” значна большай за рост чалавека, на асобных палях яна дасягае 3,5 метра ў вышыню, здалёк можна і камбайн не заўважыць з такім ураджаем, — заўважаў пры размове механізатар ААТ “Ракітніца” Генадзь Стальмашук.
У сельскай гаспадарцы ён працуе ўжо 25 гадоў. У “гарачы” ўборачны час перасядае Генадзь са сваёй “газэлі” на зернеўборачны камбайн. А калі паспявае кукуруза, шчыруе на новым камбайне “Палессе-800”. Вытворчая магутнасць гэтага камбайна вялікая — тысяча тон у дзень, таму аднаго экіпажу хапае, каб своечасова ўбраць увесь ураджай. Генадзь Стальмашук на поле выходзіць у 8 гадзін раніцы, абедае таксама ў полі, гарачыя і смачныя стравы, што дастаўляюцца сюды, падабаюцца механізатару. Вялікая роля ў нарыхтоўцы кармоў з кукурузы належыць таксама людзям, якія заняты на адвозцы сіласу. Больш за трыццаць гадоў за “баранкай” машын вадзіцелі — Віктар Горб, Мікалай Сяргейчык і Міхаіл Супрунюк. Такім зладжаным калектывам усе яны працуюць ўжо не адзін сезон.
Дарэчы, уборка кукурузнай масы не прыпыняецца нават тады, калі надвор’е падкідвае нечаканыя сюрпрызы. Невялікі дождж — не перашкода. Тэхналогіі вырошчвання і ўборкі культуры дазваляюць не губляць час на чаканне больш спрыяльных умоў.
У ААТ “Ракітніца” кукуруза вырошчваецца на плошчы ў 460 га. На 5 верасня, згодна з аператыўнымі зводкамі, сельгаскультура была ўбрана на 135 гектарах, на сілас назапашана яе 5300 тон.
— 14-15 тон кукурузы мы плануем закласці на сілас, астатнюю — пакінем на зерне, а гэта прыкладна 150 гектараў, — заўважыў дырэктар ААТ “Ракітніца” Раман Уладзіміравіч Гарох. — Увогуле, ураджайнасць яе сёлета выдалася нядрэнная. Спадзяемся, што будзе каля 420 цэнтнераў масы з гектара.
   Дар’я ПАДАЛІНСКАЯ.
    На зымках: своечасова адвозяць з поля кукурузную масу шафёры В.У. Горб, М.Р, Сяргейчык, М.Р. Супрунюк; трактарыст Г.А. Стальмашук на ўборцы кукурузы ААТ «Ракітніца».
    Фота Ірыны ЖУК.

Поделиться ссылкой:

Popularity: 1%

Оставить комментарий

Ваш электронный адрес не будет опубликован.


*


Этот сайт использует Akismet для борьбы со спамом. Узнайте как обрабатываются ваши данные комментариев.

Top