У Жабінкаўскім ГДК адбыўся канцэрт узорнага калектыву народнага танца «Каруначкі»

Цудоўным падарункам да Дня закаханых стаў канцэрт узорнага калектыву народнага танца “Каруначкі” пад кіраўніцтвам Ірыны Румко.
Ва ўтульнай зале гарадскога Дома культуры сабраліся не толькі закаханыя і сямейныя пары, але і ўлюбёныя ў мастацтва жабінкаўцы. Атрымаць асалоду ад народных танцаў і падтрымаць юных танцораў прыйшлі таты і матулі, бабулі і дзядулі, брацікі і сястрычкі. Прысутнічалі ў зале і былыя выпускнікі Ірыны Феафанаўны, іх бацькі.
Канцэрт “Каруначкаў”, як заўжды, атрымаўся яркім, цікавым, зачаравальным, эмацыянальным. Хуткая змена танцаў, неапісальнай прыгажосці касцюмы не маглі не захапляць прысутных. Акрамя даўно знаёмых і любімых танцавальных кампазіцый: “Лявоніха”, “Украіна”, “Гапак”, “Самавар”, “Наш край”, “Фіглі-міглі”, парадавалі гледачоў самабытны “Бабулін куфэрак” ды ўкраінскі народны танец “Вяснянка”. Бурнымі апладысментамі яны сустрэлі харэаграфічныя замалёўкі “На пажары” і “Пеўнічак”. Запамінальна, ярка выступілі з сольнымі нумарамі Злата Лукашэвіч, Аляксандра Скарына і Ксенія Шырокава. У невялікіх перапынках спявалі дыпламанткі конкурсаў рознага ўзроўню Надзея Чэчалева, Вераніка Анташок і Кіра Рыкава.
Вёў канцэртную праграму харызматычны Барыс Мышкавец, які актыўна ўзаемадзейнічаў з залай. Ён расказаў, што ў дзень беларуска-ўкраінскай культуры ў Рэспубліцы Польшча, што ладзіўся ў Варшаве, менавіта ансамбль “Каруначкі” прадстаўляў культуру Беларусі і Украіны, што несумненна выклікае гонар і сведчыць пра яго статуснасць.
Выступленне ўзорнага калектыву народнага танца “Каруначкі” чарговы раз пацвердзіла, што нездарма жабінкаўскія танцоры з’яўляюцца лаўрэатамі і дыпламантамі многіх міжнародных конкурсаў і фестываляў, пяці-кратнымі ўладальнікамі гран-пры міжнароднага фестывалю ў Польшчы!
Наталля ВАЛОШКА

Поделиться ссылкой:

Popularity: 1%