Першая ў “Энергамарафоне”

Завяршыўся абласны этап рэспубліканскага конкурсу “Энергамарафон”, які праводзіўся пад эгідай галоўнага ўпраўлення па адукацыі Брэсцкага аблвыканкама і абласнога інстытута развіцця адукацыі. Для ўдзелу ў ім было заяўлена 206 работ. Упершыню ў гэтым конкурсе ў ліку пераможцаў абласнога этапу прадстаўніца Жабінкі — намеснік дырэктара па выхаваўчай рабоце другой гарадской школы Наталля Урбан. Яе работа ў намінацыі “Сістэма адукацыйнага працэсу і інфармацыйна-прапагандысцкай работы ў сферы энергазахавання ва ўстанове адукацыі” прызнана лепшай, аўтар узнагароджана дыпломам І ступені.

Падружыся са спортам!

На працягу некалькіх гадоў Міністэрства адукацыі Рэспублікі Беларусь і рэспубліканскае дзяржаўнае грамадскае аб’яднанне “Прэзідэнцкі спартыўны клуб” праводзяць конкурс дзіцячага малюнка “Падружыся са спортам!”. У другой гарадской школе адбыўся яго першы этап. Лепшымі прызнаны творчыя работы трэцякласніц Соф’і Царук і Маргарыты Лугаўцовай, а таксама пяцікласніка Кірыла Філіпука. Малюнкі дзяцей прымуць удзел у другім этапе.

Іх подзвіг не забудзем

У гонар воінаў-інтэрнацыяналістаў у другой гарадской школе ладзіўся турнір па настольным тэнісе сярод вучняў і настаўнікаў. У 5-11 класах прайшлі класныя гадзіны “Афганістан — боль у маёй душы”, “Трагедыя і доблесць Афгана”, “Адвага. Мужнасць. Гонар”, “Беларускія воіны-інтернацыяналісты: гісторыя і традыцыі”, “Ордэны і медалі: гісторыя подзвігу”. У фае школы была размешчана тэматычная кніжная выстава “Іх подзвіг не забудзем”.
Дзявочая школьная каманда спаборнічала ў турніры па валейболе памяці Васіля Дудара, што традыцыйна праводзіцца ў Крыўлянскай сярэдняй школе.
Педагог-арганізатар СШ № 2 Аляксандра Вараб’ёва арганізавала выступленне лектарскай групы “Далёкае рэха Афганскай вайны”. Другакласнікі наведалі Ленінскую школу, у якой вучыўся Валерый Мігель. Вучні сярэдняга звяна ўсклалі кветкі да магілы Васіля Дудара, які, як і Мігель, загінуў у Афганістане.

Ёсць ідэя? Падзяліся!

У першай гарадской школе прайшоў фестываль метадычных ідэй “Развіццё творчых і інтэлектуальных здольнасцей вучняў праз індывідуальна-дыферэнцыраваны падыход у навучанні”.
У рамках фестывалю былі праведзены 15 адкрытых вучэбных заняткаў у класах, дзе прадметы вывучаюцца на павышаным узроўні, два — у класах з базавым вывучэннем прадметаў, адны заняткі — на пункце карэкцыйна-педагагічнай дапамогі. Настаўнікі дэманстравалі выкарыстанне сучасных педагагічных тэхналогій, суправаджалі іх мультымедыйнымі прэзентацыямі, інтэрактыўнымі заданнямі.

Выбар прафесіі — аснова будучыні

Падчас тыдня адчыненых дзвярэй “Профільнае навучанне — аснова прафесійнай будучыні” ў 9 і 11 класах СШ № 1 Жабінкі адбыліся класныя гадзіны, на якіх вучні пазнаёміліся з багатым светам прафесій. На заняткі былі запрошаны і бацькі.
На бацькоўскім сходзе “Як дапамагчы школьніку выбраць далейшы адукацыйны маршрут” педагог-псіхолаг расказала матулям і татам аб правілах выбару прафесіі. Бацькі былі азнаёмлены з правядзеннем выніковай атэстацыі і выпускных экзаменаў, арганізацыяй профільнага навучання і педагагічных класаў у 2020/2021 навучальным годзе, удзелам навучэнцаў у рэпетыцыйным тэсціраванні.

Задаволіць густы пакупнікоў

Адкрыццё чарговай фірменнай гандлёвай кропкі ААТ “Жабінкаўскі камбікормавы завод” — выдатны падарунак жыхарам горада Кобрына. Пад адным дахам размясціліся два аддзелы: прадуктовы і кармоў для ўсіх відаў сельгасжывёл, хатніх любімцаў, прыкормкі для лоўлі рыбы. Выпускаемая прадукцыя нашага завода можа задаволіць густы самых патрабавальных спажыўцоў. Дарэчы, ужо налічваецца каля пяцідзесяці гандлёвых кропак прадпрыемства.

Поделиться ссылкой:

Popularity: 1%

Оставить комментарий

Ваш электронный адрес не будет опубликован.


*


Этот сайт использует Akismet для борьбы со спамом. Узнайте как обрабатываются ваши данные комментариев.

Top