У Жабінкаўскім раёне пачаў дзейнічаць новы праваахоўны орган

У Жабінкаўскім раёне пачаў дзейнічаць новы праваахоўны орган

З 1 студзеня гэтага года пачаў дзейнічаць Жабінкаўскі раённы аддзел Следчага камітэта Рэспублікі Беларусь. Узначаліў яго падпалкоўнік юстыцыі Аляксандр Ціханавіч Дзягель, які раней працаваў на пасадзе пракурора раёна. З ім размова пра задачы, пастаўленыя перад новай следчай структурай, шляхах іх вырашэння.
— Аляксандр Ціханавіч, навошта створаны ў краіне Следчы камітэт?
— Галоўныя задачы, якія вырашаюць супрацоўнікі гэтай структуры, — аб’ектыўнае, усебаковае расследаванне пры ўзбуджэнні крымінальных спраў і правядзенні папярэдняга следства. Вельмі правільна, што створаны орган цалкам незалежны ў сваіх дзеяннях, непадпарадкаваны іншым ведамствам. Гэта гарантуе самастойнасць у дзеяннях, дазваляе ўдасканаліць дзейнасць папярэдняга следства і ўзмацніць абарону правоў і законных інтарэсаў грамадзян у дасудзебнай крымінальнай вытворчасці.
— Колькі спецыялістаў у яго складзе?
— Акрамя начальніка аддзела ў штатным раскладзе прадугледжана пасада майго намесніка, якую займае маёр юстыцыі Аляксей Іванавіч Струк. За ягонымі плячыма — пятнаццаць гадоў службы ў органах унутраных спраў. Найбольшы цяжар у раскрыцці, вядзенні спраў ускладаецца на следчых: маёраў Дзмітрыя Яўгенавіча Галаванчука, Віталя Віктаравіча Сірэнку, Аляксандра Мікалаевіча Кузьміча, падпалкоўніка Сяргея Аляксеевіча Шалягейку, капітанаў Яўгена Уладзіміравіча Самускевіча і Ірыну Анатольеўну Мельнічук. Акрамя іх у склад аддзела ўваходзіць інспектар групы рэжымна-сакрэтнай дзейнасці маёр юстыцыі Вікторыя Віктараўна Раецкая.
— Чым займаліся супрацоўнікі раённага аддзела Следчага камітэта ў першы месяц працы? Даследуеце старыя справы альбо ўзніклі новыя?
— Пасля стварэння Следчага камітэта нам былі перададзены 24 крымінальныя справы ад папярэдняга расследавання Жабінкаўскага РАУС, аднак за гэты час узбуджана і 15 новых. Крымінальныя справы розныя: большасць — крадзяжы маёмасці грамадзян, дарожна-транспартныя здарэнні (у тым ліку са смяротным зыходам). Аднак ёсць у распрацоўцы і справы, што датычацца незаконнага захоўвання боепрыпасаў і наркотыкаў, нявыплаты аліментаў, крадзяжы з банкаматаў, інш. Следчыя дзяжураць у складзе следча-аператыўнай групы раённага аддзела ўнутраных спраў. Калі ў РАУС паступае інфармацыя аб злачынстве, дзяжурны накіроўвае на месца групу на чале са следчым, які прымае рашэнне аб узбуджэнні крымінальнай справы.
— Якія вынікі аддзела ў абароне законнасці?
— Хоць тэрмін існавання Следчага камітэта на Жабінкаўшчыне пакуль невялікі, але за гэты час дзевяць спраў ужо накіраваны ў суд, у адным выпадку справа спынена, паколькі грамадзяне пайшлі на прымірэнне. Адзначым, што за час работы раённага аддзела Следчага камітэта не было выпадкаў незаконных затрыманняў грамадзян, валакіты ў разглядзе крымінальных спраў. Таму жабінкаўцы заўсёды могуць звярнуцца да нас па дапамогу, каб атрымаць кампетэнтны адказ, адчуць большую абароненасць сваіх правоў, якія гарантуе заканадаўства Рэспублікі Беларусь.
Гутарыў Анатоль РОСТАЎ.

Popularity: 1%

Оставить комментарий

Ваш электронный адрес не будет опубликован.


*


Этот сайт использует Akismet для борьбы со спамом. Узнайте как обрабатываются ваши данные комментариев.

Top