Даўгалецце ва ўнукаў суквецці

Даўгалецце ва ўнукаў суквецці

Дар’я НІКАНЧУК. Фота аўтара.

Першага кастрычніка мы адзначаем свята тых, хто мае бясцэнны вопыт, зведаў шмат выпрабаванняў лёсу, з’яўляецца прыкладам для сваіх дзяцей, унукаў і праўнукаў. Белыя павуцінкі ўпрыгожваюць іх валасы, а жыццё поўніцца мудрасцю. У мінулую пятніцу людзей шаноўнага ўзросту павіншавалі са святам у гарадскім Доме культуры.

 

Вядучая ўрачыстасці загадчык дзіцячага сектара ГДК Яна Макасюк заўважыла, што кожная сям’я ствараецца на багатай спадчыне сваіх продкаў. “Гэтыя людзі перадаюць нашчадкам неабходны жыццёвы вопыт, веды і традыцыі, на якіх з цягам часу будзе выхавана не адно пакаленне, – падкрэсліла вядучая. – Сёння ў ваш гонар гучаць самыя добрыя і шчырыя словы!”
Да прысутных звярнулася намеснік старшыні райвыканкама Ала Ануфрыюк. Яна нагадала, што пажылыя людзі павінны адчуваць наш клопат і ўвагу, дапамогу і падтрымку. Ала Сцяпанаўна павіншавала іх са святам і пажадала моцнага здароўя, даўгалецця, радасці і дабрабыту.
Са святочнай сцэны цёплыя словы гучалі таксама ў гонар шаноўных юбіляраў. Сёлета 90-годдзе адзначылі Ніна Дзмітрыеўна Паўлючук і Вера Маркаўна Мышкавец, Марыя Аляксееўна Мазоль і Арсеній Васільевіч Жук. З 95-гадовым юбілеем віншавалі Веру Кузьмінічну Мурыну і Ядвігу Людвігаўну Церпілоўскую.
Музычныя нумары для ўсіх гасцей мерапрыемства падаравалі салісты ГДК Валерый Няменьшы і Аксана Пракошына, Марыя Філаненка і Ульяна Аніскевіч, а таксама народны хор ветэранаў “Тонус”.

Пад час свята ў фае Дома культуры была арганізавана выстава. На ёй жабінкаўцы шаноўнага ўзросту дэманстравалі ўласныя вырабы з розных матэрыялаў і смачныя падарункі восені са свайго агарода. Работы паказалі, што кожны з іх мае талент. Старэйшае пакаленне займаецца вышыўкай і выяўленчым мастацтвам, вязаннем і разьбой па дрэве, стварае сапраўдную прыгажосць з бісеру і тканіны, а таксама атрымлівае багаты ўраджай садавіны і гародніны. У выставе паўдзельнічалі Валянціна Слясарчык, Генадзь Бжоска, Аляксандр Крыўчэня, Валянціна Літвінюк, Вера Якубук і іншыя. – Паглядзіце на свае далоні: з цягам часу на іх з’явіліся мазолі і маршчынкі, якія сведчаць пра ваш нялёгкі лёс, – звярнулася да прысутных вядучая. – Яшчэ на вашых працавітых руках пралегла лінія жыцця. Няхай яна будзе як мага даўжэйшай, а свае юбілеі вы будзеце сустракаць у суквецці ўнукаў і праўнукаў!

 

Popularity: 1%

Оставить комментарий

Ваш электронный адрес не будет опубликован.


*