Завяршыўся прыём подпісаў ад ініцыятыўных груп

Завяршыўся прыём подпісаў ад ініцыятыўных груп

209265-01
Тэрытарыяльныя выбарчыя камісіі завяршаюць прыём подпісаў ад ініцыятыўных груп патэнцыяльных кандыдатаў на вышэйшую дзяржаўную пасаду 21 жніўня ў 19.00. Далей адбудзецца праверка падпісных лістоў на сапраўднасць. Большасць ініцыятыўных груп заяўляе аб тым, што яны прайшлі вызначаны рубеж у 100 тыс. подпісаў. Калі падпісныя лісты вытрымаюць праверку ў выбарчых камісіях, то прэтэндэнты, якіх вылучылі гэтыя групы, стануць кандыдатамі на пасаду Прэзідэнта Беларусі.
ПАВОДЛЕ ДАНЫХ на 20 жніўня, больш за ўсё подпісаў сабрала ініцыятыўная група Аляксандра Лукашэнкі — больш за 1 млн.
Як паведамілі ў штабе Сяргея Гайдукевіча, за яго сабрана ўжо больш як 130 тыс. подпісаў. Пры гэтым іх збор каманда спыніла яшчэ ў канцы мінулага тыдня, а затым ініцыятыўная група праводзіла ўнутраную праверку падпісных лістоў. На гэты час амаль усе яны перададзены ўжо ў тэрытарыяльныя выбаркамы. Каардынатар штаба Алег Гайдукевіч удакладніў, што засталася толькі нязначная колькасць подпісаў, якія будуць здадзены ў бліжэйшы час.
Ініцыятыўная група Віктара Цярэшчанкі 20 жніўня пачала здаваць подпісы ў тэрытарыяльныя выбарчыя камісіі. «Колькасць сабраных подпісаў я цяпер назваць не магу, але для сябе мы ацэньваем вынікі праведзенай работы як паспяховыя. Усё прайшло без эксцэсаў і парушэнняў», — сказаў кіраўнік ініцыятыўнай групы Алег Несцяркоў. Паводле апошніх дадзеных, у падтрымку Віктара Цярэшчанкі сабрана 128 тыс. подпісаў.
У штабе Таццяны Караткевіч не назвалі дакладную колькасць ужо сабраных подпісаў, але адзначылі, што плануюць здаць у выбаркамы каля 120 тыс.
Міхаіл Образаў — кіраўнік ініцыятыўнай групы Дзмітрыя Улаховіча — паведаміў, што сабрана 100 тыс. подпісаў. У штабе мяркуюць, што ў тэрытарыяльныя камісіі будзе здадзена 110 тыс.
Пакуль няма дакладнай інфармацыі аб подпісах у падтрымку Сяргея Калякіна. Кіраўнік ініцыятыўнай групы Валерый Ухналёў растлумачыў, што на мінулым тыдні было 70 тыс. подпісаў. На гэты час штаб пакуль не падлічваў, колькі іх яшчэ ўдалося сабраць.
Віктар Карнеенка — кіраўнік ініцыятыўнай групы па вылучэнні Анатоля Лябедзькі — паведаміў, што, паводле даных на панядзелак, было 50 тыс. подпісаў. 21 жніўня ў штабе падвядуць канчатковыя вынікі.
У сваю чаргу прэтэндэнт у кандыдаты на прэзідэнцкую пасаду Жанна Раманоўская пакуль не можа назваць колькасць подпісаў, сабраных у яе падтрымку.
«УСЕ ПОДПІСЫ паступаюць у раённыя камісіі, пры гэтым іх прыёмка адзначаецца ў журнале, дзе распісваецца член камісіі. Здаваць подпісы павінен каардынатар па раёне», — растлумачыла Лідзія Ярмошына.
Пасля акта здачы-прыёмкі лісты аглядаюцца, выключаюцца тыя подпісы, якія не падлягаюць праверцы і ўліку — у прыватнасці, гэта подпісы грамадзян, якія пражываюць у іншым раёне, у іншай адміністрацыйнай тэрытарыяльнай адзінцы (з-за таго, што адносяцца да іншай камісіі).
Яшчэ адна катэгорыя «браку» — подпісы, выключаныя самім зборшчыкам (ён упаўнаважаны гэта зрабіць, калі знаходзіць дэфект). Пры гэтым недакладнымі подпісамі лічаць фіктыўныя (выкананыя ад імя неіснуючых асоб і выдадзеныя за сапраўдныя), выкананыя ад імя розных людзей адным чалавекам або ад імя аднаго чалавека іншым, а таксама подпісы людзей, якія не валодаюць выбарчым правам, або сабраныя да 23 ліпеня 2015 года. Бракуюцца подпісы ў выпадку, калі ў звестках аб выбаршчыку адсутнічае адно або некалькі патрэбных у адпаведнасці з законам дадзеных, калі звесткі аб выбаршчыку ўнесены нерукапісным спосабам або алоўкам і калі дата подпісу выканана няўласнаручна.
Як вядома, членам ініцыятыўных груп нельга прапаноўваць узнагароджанне за ўнясенне подпісу, і не павінна быць якога-небудзь прымушэння ў гэтым працэсе. Усе без выключэння подпісы ў лісце прызнаюцца недакладнымі, калі яны сабраны не членам ініцыятыўнай групы, падпісны ліст не завераны членам ініцыятыўнай групы або завераны тым членам ініцыятыўнай групы, які подпісы не збіраў. У выпадку выяўлення некалькіх подпісаў аднаго і таго ж выбаршчыка ў падтрымку вылучэння аднаго і таго ж кандыдата дакладным лічыцца толькі адзін аўтограф, а астатнія анулююцца.
Пасля выключэння подпісаў, якія не падлягаюць праверцы, па кожнай групе адбіраецца аднолькавы працэнт астатніх подпісаў.
Калі сумарная колькасць недакладных подпісаў выбаршчыкаў складзе больш за 15 працэнтаў ад агульнай колькасці правераных, то раённая, гарадская, раённая ў горадзе камісія спыняе далейшую праверку і ўсе подпісы выбаршчыкаў не ўлічваюцца па гэтым раёне, горадзе, раёне ў горадзе. «Але адразу магу сказаць, што ў нас такога прэцэдэнту на прэзідэнцкіх выбарах не было ніколі. Выключаецца толькі нейкая колькасць подпісаў», — адзначыла Лідзія Ярмошына.
Праўда, паводле яе слоў, ініцыятыўныя групы, якія прадставілі для праверкі роўна 100 тыс. подпісаў або крыху больш, здорава рызыкуюць. «У выніку, верагодна, тысяча-другая адпадзе і можа аказацца менш за 100 тыс. Не хацелася б, таму што сабраць і прадставіць такую колькасць подпісаў — вельмі складаная работа», — упэўнена старшыня Цэнтрвыбаркама.
Калі подпісы будуць падлічаны, раённая камісія складзе пратакол аб іх колькасці па кожным патэнцыяльным кандыдаце і прадставіць у вобласць. «Пры жаданні абласная камісія таксама можа штосьці праверыць (калі будуць нейкія скаргі або падазрэнні), а затым ужо складае пратакол па вобласці», — нагадала тэхналогію Лідзія Ярмошына. Усе лічбы будуць падсумаваны Цэнтральнай выбарчай камісіяй.
«Спадзяюся, што да 10 верасня мы правядзём пасяджэнне камісіі і зарэгіструем (кандыдатамі ў прэзідэнты. — Заўвага БелТА) людзей, якія выканалі ўсе агавораныя ўмовы», — сказала Лідзія Ярмошына.
У БЕЛАРУСІ для маніторынгу прэзідэнцкіх выбараў акрэдытаваны 516 нацыянальных наглядальнікаў, паведаміла 18 жніўня старшыня Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў Лідзія Ярмошына на сустрэчы з кіраўніком місіі наглядальнікаў ад СНД на прэзідэнцкіх выбарах, старшынёй Выканаўчага камітэта — выканаўчым сакратаром СНД Сяргеем Лебедзевым.
У склад місіі Садружнасці на прэзідэнцкіх выбарах у Беларусі ўвойдуць амаль 400 наглядальнікаў. Аб гэтым паведаміў 18 жніўня журналістам кіраўнік місіі наглядальнікаў ад СНД Сяргей Лебедзеў па выніках сустрэчы са старшынёй Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў Лідзіяй Ярмошынай.
У складзе місіі будуць прадстаўнікі Казахстана, Кыргызстана, Узбекістана, Таджыкістана, Арменіі, Азербайджана, Туркменістана. У традыцыі місіі Садружнасці ўжо ўваходзіць завочнае назіранне за ходам падрыхтоўкі да выбараў — маніторынг па інтэрнэце, у сродках масавай інфармацыі. Наглядальнікі наведаюць усе вобласці, дзе азнаёмяцца з вынікамі ўтварэння тэрытарыяльных выбарчых камісій, ходам праверкі подпісаў, сабраных ініцыятыўнымі групамі ў падтрымку вылучэння кандыдатаў у прэзідэнты, папрысутнічаюць на пасяджэннях раённых, гарадскіх выканаўчых камітэтаў, прысвечаных пытанням утварэння ўчастковых камісій па выбарах кіраўніка дзяржавы.
Выбары Прэзідэнта назначаны на 11 кастрычніка.
БелТА.

Поделиться ссылкой:

Popularity: 1%

Оставить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.

Top