І ўдзень, і ўначы спакою не даюць кібермахляры
У наш час, здаецца, для чалавечай зручнасці прыдуманы і развіваюцца сацыяльныя сеткі. Ды бывае, што карыстаюцца імі зламыснікі, якія спакою не даюць сумленным грамадзянам. Вось, напрыклад, захацелася Юноне З. (тут і далей імёны з этычнага пункту погляду змененыя) атрымаць дзіцячыя рэчы. Звярнулася жанчына праз інтэрнэт да невядомага, які быццам абяцаў забяспечыць продаж і дастаўку цацак ды адзежы для маленькіх. Хоць насамрэч кібермахляр і не збіраўся выконваць узятыя на сябе абавязкі, затое пераканаў Юнону, што ёй патрэбна перавесці больш за сотню рублёў на названую плацежную картку. Жанчына так і зрабіла, у выніку не толькі новых рэчаў не пабачыла, але й без грошай засталася.
Яшчэ большыя матэрыяльныя страты панесла іншая жабінкаўчанка, што паверыла тэлефоннаму зламысніку, якому назвала рэквізіты сваёй карткі. Той “добразычлівец” абяцаў абараніць жанчыну ад… злачынства, а ў выніку сам нахабна залез да яе ў кішэню, спісаўшы з карткі грашовыя сродкі на суму ў тысячу рублёў. Хочацца зноў звярнуцца да жыхароў раёна: будзьце пільнымі, не дазваляйце махлярам нажывацца на вас.
Па інфармацыі начальніка райаддзела Следчага камітэта Рэспублікі Беларусь Віталя ГАЛЕНЧУКА матэрыялы для друку падрыхтаваў Анатоль БЕНЗЯРУК
Поделиться ссылкой:
Popularity: 1%
