Людзі, што ствараюць свята

Людзі, што ствараюць свята

Тлумачальныя слоўнікі знаходзяць больш за дзве сотні азначэнняў для слова “культура”. Для кожнага, хто працуе ў культуры, ёсць сваё тлумачэнне. Напярэдадні іх прафесійнага свята, як цяпер кажуць, “перасякліся” з некаторымі прадстаўнікамі “арміі культработнікаў”. Каб павіншаваць і пачуць, што для кожнага з іх ёсць культура. Суразмоўцаў выбіралі невыпадковых: кожны з іх сёлета ўганараваны на ўзроўні рэспублікі, вобласці, раёна, аддзела ідэалагічнай работы, культуры і спраў моладзі райвыканкама.
IMG_1734Мікалай Васільевіч ЗІНОЎЕЎ, выкладчык Ленінскай дзіцячай школы мастацтваў, кіраўнік народнага вакальнага ансамбля “Каларыт”; узнагароджаны Граматай Міністэрства культуры Рэспублікі Беларусь:
— Для мяне культура — жыццё. Першы раз выйшаў на сцэну ў летніку вось такім (паказвае “два вяршкі ад падлогі”) — у гадоў 8-9 і зарабіў свой першы ганарар — “чырвонец” ад слухача-трактарыста! Хутка мне 60, з гэтых гадоў большасць прысвечана Жабінцы і яе культуры. Пад “сцягам” гэтай справы, з мікрафонам і пры сцэнічным “парадзе” аб’ездзілі шмат месцаў. Паўсюль людзям трэба свята, і наш “Каларыт” заўсёды стараўся яго ствараць. Усе мае “хлопчыкі” ўжо перасягнулі мяжу ў 50 гадоў, таму няхай Бог іх сілы мацуе, каб і надалей спявалася і маглося. Сфатаграфуйце, калі ласка, мяне з Валеркам Няменьшым: ужо 34 гады, ад вытокаў, мы разам у ансамблі. Ёсць у калектыве і дзяўчаты — Аксана Пракошына і Ірына Рынчук. Яны —
упрыгажэнне “Каларыту”, як на іх глядзім — і самі маладзеем!
IMG_1721Аксана Аляксандраўна КАПЧУК, рэжысёр арганізацыйна-метадычнага цэнтра; уганараваная сумеснай Граматай галоўнага ўпраўлення ідэалагічнай работы, культуры і спраў моладзі і абкама прафсаюза работнікаў культуры:
— У мяне культура ў крыві, з самага дзяцінства. Колькі сябе памятаю, заўсёды з нататнікам і алоўкам. Толькі пачую ад некага трапнае слова ці жарт — рука сама цягнецца запісаць, каб потым скарыстаць у сцэнарыі чарговага мерапрыемства. Сюды прыйшла тузін гадоў таму пасля Пінскага каледжа мастацтваў, адразу была загадчыцай Здзітаўскага СК, а праз шэсць гадоў стала рэжысёрам. У памяці захаваліся цёплыя ўспаміны пра “Дажынкі” ў Кобрыне, дзе была вядучай. Вельмі люблю рыхтаваць святы да Дня Перамогі і Дня працаўнікоў сельскай гаспадаркі, на якія даводзіцца выкладвацца і творча, і фізічна. Але ж якое задавальненне адчуваеш пасля ўдалага свята! Бо кожнае мерапрыемства перажываеш, літаральна прапускаеш праз сябе. Сёлета вельмі кранулі цырыманіялы ў Драмлёве і пры ўзнагароджванні медалямі ветэранаў-афганцаў. У такія дні адчуваеш, што ўсе мы адна каманда, скіраваная на агульны поспех. Таму хачу пажадаць усім творчай энергіі, вялікага аптымізму, які нясе культура.
IMG_1728Алена Мікалаеўна ЛАГОТА, намеснік галоўнага бухгалтара цэнтралізаванай бухгалтэрыі; узнагароджана граматай аддзела ідэалагічнай работы, культуры і спраў моладзі райвыканкама:
— Культура — гэта не толькі праца, але й дотык да агульначалавечага багацця. У гэтым кабінеце таксама, як гаворыцца, “культура рухаецца ў масы”, бо што ўвогуле можа рухацца без грошай? Яны ж —
“кроў” для любой справы! Адсюль, з бухгалтэрыі, усё пачынаецца: за кожным, нават невялічкім мерапрыемствам, — фінансы, і калі яны “спяваюць рамансы”, нічога годнага не атрымаецца! Ужо 14 гадоў (пасля Валкавыскага недзяржаўнага тэхнікума эканомікі і права і Брэсцкага дзяржаўнага тэхнічнага ўніверсітэта) працую ў культуры. Праца падабаецца — гэта ж асаблівая бухгалтэрыя, размешчаная ў цэнтры песень, танцаў і іншых цікавых спраў. Жадаю работнікам культуры і іх сем’ям здароўя і грошай паболей — каб на ўсё хапала, каб душа спявала, а не плакала.
IMG_1741Алена Аляксееўна РАДКЕВІЧ, загадчыца аддзела камплектавання, апрацоўкі і арганізацыі адзінага фонду ЦБС цэнтральнай раённай бібліятэкі; уганараваная Пісьмом падзякі райвыканкама:
— Культура — гэта прыгажосць жыцця, а можа, і само жыццё. Без яе цяжка ўявіць свет і чалавека ў ім. Без кнігі гэта, лічу, немагчыма, таму і лёс свой звязала з бібліятэчнай справай. Сёлета ў мяне прыемная па-дзея: закончыла Беларускі дзяржаўны ўніверсітэт культуры і мастацтва па спецыяльнасці “бібліятэкар-бібліёграф, менеджар”. Дапамогаю жабінкаўцам мець кніжныя навінкі, для гэтага афармляем заказы з выдавецтвамі — не толькі айчыннымі, але і расійскімі. Гэта дазваляе нашым чытачам заўсёды мець сучасныя, багата ілюстраваныя кніжныя выданні.
У гэты перадсвяточны дзень хочацца пажадаць работнікам культуры цікаўных і ўдзячных гледачоў, слухачоў і чытачоў!
IMG_1738Таццяна Іванаўна ДАВІДЧЫК, відэадэманстратар камунальнага ўнітарнага кінавідовішчнага прадпрыемства “Жабінкаўскае раённае кінавідэапрадпрыемства”; узнагароджана граматай аддзела ідэалагічнай работы, культуры і спраў моладзі:
— Амаль уся мая дзейнасць (а гэта ўжо 17 гадоў) звязана з культурай. Таму яна — частка мяне самой. Тым больш, што маю адну з цікавейшых прафесій: дэманструю кіно, пазнавальныя фільмы, мульцікі для дзетак у садзіках і школах. Вельмі прыемна бачыць, як гараць іх вачаняткі, чуць, як абмяркоўваюць відэастужкі. Гавораць, святаў многа не бывае, а ў мяне яны амаль штодня! Паколькі няма нічога лепш, чым дарыць шчасце і радасць іншым, асабліва маленькім гледачам! Сённяшні сінематограф нельга нават параўнаць з мінулым, настолькі ён яркі, захапляльны, відовішчны. Напярэдадні Дня работнікаў культуры хачу пажадаць усім, хто стварае святы для іншых, каб не гаснуў у іх агеньчык творчасці, каб мелі яны самыя лепшыя ўзнагароды ад удзячных людзей!
Гутарыў Анатоль БЕНЗЯРУК.
Фота Ірыны ЖУК.

Поделиться ссылкой:

Popularity: 1%

Оставить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.

Top