Праздник яблок в Хмелево

На Спас, у Хмелева…
“Бог беражэ куточак мілы”
Імя вёскі Хмелева, упісанае ў гістарычны летапіс нашай зямлі, упершыню загучала з часоў Вялікага Княства Літоўскага. Сёлета вяскоўцам ёсць што святкаваць. Найперш, у ліпеньскую спякоту, сяло адлічыла 445 гадоў з часу заснавання. А на самым ускрайку шчодрага сонечнага лета, калі прыйшлі Спасы — мядовы, яблычны, хлебны, Хмелеўскі храм адзначыў свае 285-ыя ўгодкі, а Спаса-Праабражэнскі манастыр — першае дзесяцігоддзе.
… Хросным ходам цячэ людская рака, узначаленая епіскапам Брэсцкім і Кобрынскім Іаанам. Святары нясуць харугвы, абраз Маці Божай Чанстахоўскай, які лічыцца цудатворным, а меладычны царкоўны перазвон разносіцца па наваколлі. На людскіх тварах — спакой, а ў сэрцах — адчуванне радасці.
Такім можна было пабачыць у раніцу 19 жніўня пачатак вялікага царкоўнага свята Праабражэння.
Уладыка Іаан, звяртаючыся да прыхаджан, абвясціў вялікую Боскую ласку, што струменіцца, быццам сонечныя промні, на душы людскія ў светлы дзень. Многія не стрымлівалі слёзы, бо гэта былі слёзы радасці, асвячалі яблыкі, іншыя дары нашай зямлі, ішлі да блаславення. Хто найбольш дзейсна дапамагаў развіццю манастыра, з рук епіскапа атрымаў высокія ўзнагароды. Старшыня СВК “Хмелева” Б.У.Парафянюк уганараваны  медалём Святога Кірылы Тураўскага, старшыня Хмелеўскага сельвыканкама І.М.Андрайчук — Пісьмом падзякі “За старанную працу ў славу Святой Царквы”.
Па традыцыі, якой ўжо некалькі стагоддзяў, паблізу храма ладзілася выстава-продаж работ народных майстроў “Мядовы смак — цуд добрых рук”. Плеценыя кошыкі прапаноўвалі хмелеўцы Каця Трафімук і Саша Дырман. Можна было паспытаць і прыдбаць цудоўны мёд у Чэслава Янкоўскага з пасёлка Ленінскі. А кобрынскія майстрыхі Юлія Піваварава, Галіна Канцэвіч, Наталля Клімук дэманстравалі свае вышыўкі, работы з саломкі…
Пасля царкоўнай службы святкаванне перамясцілася ў цэнтр вёскі — да Хмелеўскага СДК, дзе ладзіўся дзіцячы канцэрт і гульнёвая праграма “Спасаўскія забаўлянкі”. Асабліва запамінальным стала фальклорнае выступленне ўзорнага калектыву “Дараносіца” з Хмелева. З вуснаў юных выканаўцаў гучалі шчырыя песенныя віншаванні роднай зямлі, якія межаваліся гарэзлівымі народнымі танцамі. А затым пачалася выстава-дэгустацыя абрадавых страў “Святкуй — смакуй”.
Маладыя ўладары сяла
— Свята вёскі Хмелева, — гаварыла намеснік старшыні райвыканкама А.С.Ануфрыюк, — выйшла за межы раёна, у тым ліку і дзякуючы конкурсу сярод маладых сем’яў. А таму стала традыцыйным.
На гэты раз арганізатарамі свята выступілі аддзел па справах моладзі райвыканкама (начальнік В.У.Бортнік), прэзідыум райкама прафсаюза работнікаў АПК, які ўзначальвае Н.У.Калыбская, і райкам грамадскага аб’яднання “БРСМ” (выконваючы абавязкі першага сакратара М.В.Лугаўской). Мерапрыемствы, як і меркавалася, паспрыялі выхаванню ў моладзі патрыятычных адносінаў, любові да вёскі і сельскагаспадарчых прафесій. Сёлетні конкурс маладых сем’яў, што праводзіўся ў рамках рэгіянальнага праекта “Уладар сяла”, называўся “Мы — сяляне”. У ім паўдзельнічалі шэсць сем’яў: Аляксандр і Святлана Касперукі з Хмелева, Віктар і Інеса Буза з Крыўлян, Сяргей і Галіна Цярохіны са Сцяпанак, Мікалай і Таццяна Пшык са Старога Сяла, адразу дзве ракітніцкія пары — Андрэй і Таццяна Грышчэні, Віталь і Наталля Чмуневічы.
Пра кожную расказваў стэнд. На ім можна было пабачыць той “Надзейны прычал” — прыгожы сельскі падворак, які сваімі рукамі стварылі канкурсанты. Апроч таго, сем’і расказвалі пра сябе ў конкурсе-прадстаўленні “Мы з табой два берагі”, паказвалі, якія яны выдатныя кулінары, як працуюць ў садзе-агародзе… Абстаноўка ў зале ўвесь вечар была надзвычай лёгкая, вясёлая, жыццярадасная. Асабліва ў час конкурсу-адпачынку “Лазня”, калі ўдзельнікі стараліся, як мага больш навязаць венікаў. Кожнай сям’і можна было пазайздросціць: адчувалася — жыве лад у іх хатах, весялосць — у сэрцах. Можа, самым адказным і трапяткім у прызнанні кахання стаў завяршальны конкурс “Я растаплю кавалачкі лёду”, дзе маладым людзям і ў сапраўднасці прыйшлося ператвараць у сваіх далонях ільдзінкі ў ваду. Таму заслужана ўсе сем’і, якія бралі ўдзел у спаборніцтве, былі заахвочаны каштоўнымі падарункамі. А пераможцамі аднагалосна былі прызнаны Віктар і Інеса Буза з вёскі Крыўляны.
Цудоўным упрыгажэннем свята сталі спевы драгічынскіх “Сваякоў” і жарты “Хмелеўскіх валацуг”. Самадзейныя артысты Наталля Дырман, Таццяна і Алена Грыцукі атрымалі не толькі шчодрыя авацыі ад удзячных землякоў, але й высокі прыгожы каравай. Напрыканцы слова ўзяў адзін з удзельнікаў конкурсу Аляксандр Каспярук. Малады хмелевец падзякаваў і журы, і аднавяскоўцам пажадаў удачы, шчасця ды папрасіў усіх:
— І надалей не марнуйце час — выбірайцеся ў Хмелева, да нас. Бо разам — і не раз мы будзем святы святкаваць!
А.БЕНЗЯРУК.
На здымках: Хмелева: свята царкоўнае і народнае.
Фота І.Жук.

Popularity: 2%

1 Comment Posted

  1. Вельмі цудоўная традыцыя — свята яблык у Хмелеве! Я ўпершыню пра такое свята пачула, выдатная задума! У нас на Стаўбцоўшчыне таксама ёсць адно традыцыйнае свята- свята бульбы. Яго праводзяць у мястэчку Дзераўная ( калгаснае прадпрыемства і СДК)і ў в. Залужжа ( уласнае прадпрыемства і СДК). Поспяхаў Вам!

Оставить комментарий

Ваш электронный адрес не будет опубликован.


*